/राष्ट्रिय झण्डा धोएर विदेशी एजेन्ट र एमसीसीको विरोध

राष्ट्रिय झण्डा धोएर विदेशी एजेन्ट र एमसीसीको विरोध

रिसेस, काठमाण्डौ

स्वतन्त्र राष्ट्रिय अभियान नेपालले माइतीघर मण्डलमा ‘विदेशी एजेन्ट’हरुले सरकारमा पुगी गाडीमा राष्ट्रिय झण्डा प्रयोग गरी बिटुलो बनाएको भन्दै झण्डा धोएर सांकेतिक विरोध प्रदर्शन गरेको छ। सहभागीले विदेशी एजेन्ट होसियार, राष्ट्रघाती एमसिसी चाहिँदैनलगायत नारासमेत लगाए ।

अभियानले ७७ वटै जिल्ला समिति, नगर र गाउँ समिति तथा अभियानका २२ वटा देशमा रहेका शाखामा समेत राष्ट्रिय झण्डा धोइएको भन्दै सांकेतिक विरोध गरिएको जनाएका छन्। कार्यक्रममा अभियानका संयोजक तथा अधिवक्ता स्वागत नेपालले यस्तो सांकेतिक विरोध सबैभन्दा शक्तिशाली शान्तिपूर्ण विरोध कार्यक्रम भएको बताए।

सन् २००० पेरुमा महिलाले मात्र आफ्नो देशको सरकारले विदेशीको इच्छाअनुसार जनघाती र राष्ट्रघाती सम्झौता गरेको विरोधमा राष्ट्रिय झण्डा धोएका र त्यसैबाट सुरु भएको यस्तो विरोध आन्दोलनले अल्बर्टो फुजीमोरीको सरकार ढलेको उनले उदाहरण दिएका थिए।

साथै, उनले पवनपुत्र हनुमानले समेत आफ्नो झण्डा विरोधीहरुले अपवित्र बनाइदिएपछि जडीबुटी र जलले धोई पवित्र बनाएको पनि स्मरण गराए। कार्यक्रममा स्वतन्त्र राष्ट्रिय साहित्यकला अभियानका विभागीय अध्यक्ष साहित्यकार तथा अधिवक्ता कृष्ण प्रसाइ, अर्थ विभाग प्रमुख बोधनाथ न्यौपानेलगायतले मन्तव्य राखेका थिए ।